Die klank [Ə] word deur "e" weergegee in onbeklemtoonde lettergrepe. Klankverwarring lei dikwels tot spelfoute wanneer twee letters dieselfde uitgespreek word in Afrikaans. Letters wat dikwels verwar word, is "ei" en "y".
Sien ook die bladsy Klankverwarring.

Woorde wat op 'n "f" eindig se meervoude word gewoonlik deur die toevoeging van 'n "-e" gevorm, terwyl die "f" 'n "w" word. Enkele uitsonderings bestaan egter waar die meervoud eenvoudig deur die toevoeging van óf 'n "-s" (bv. "sjefs" en "neefs"), óf 'n "-e" (bv. "nimfe" en "triomfe") gevorm word. Die meervoud van die telwoord "twaalf" kan sowel "twaalwe" as "twaalfs" wees.

Sien ook die bladsy Meervoudsvorme.

ʼn Persoonsnaam is ʼn afgeleide selfstandige naamwoord wat ʼn persoon aandui, byvoorbeeld “kanniedood”, “kommunis”, “protestant”, “tikster”. Dit begin gewoonlik met ʼn kleinletter.
Sien ook die bladsy Persoonsname.

Die toestel wat gebruik word om gelykstroom na wisselstroom om te skakel word 'n "wisselrigter" genoem en word veral gebruik by sonkraginstallasies. Die Engels vir 'n "wisselrigter" is 'n "inverter".
Sien ook die bladsy Vertaling en terminologie.