As 'n opeenhoping van dieselfde of verskillende vokaalletters tussen dele van samestellings meebring dat die woord verkeerd gelees kan word, word 'n koppelteken tussen die dele geplaas.
Sien ook die bladsy Vokaalopeenhoping.

Woorde wat met "her-" begin neem nie gewoonlik 'n "ge-" in die verlede tyd nie. Daar is egter 'n paar uitsonderings wat naas die basisvorm ook "ge-" in die verlede tyd kan neem, soos "herwaardeer" of "geherwaardeer", "hereksamineer" of "gehereksamineer", en "herdefinieer" of "geherdefinieer".
Sien ook die bladsy Verlede tyd.

'n Inwoner of boorling van Wallis (Engels 'Wales') staan in Afrikaans bekend as 'n "Wallieser" en het "Walliese" gewoontes. In Engels vervul die woord "Welsh" die funksie van sowel die persoonsnaam as die byvoeglike naamwoord wanneer na mense of dinge verwys word wat betrekking het op hierdie Britse deelstaat.
Kyk ook: https://af.wikipedia.org/wiki/Wallis
Sien ook die bladsy Persoonsname.

ʼn Homoniem is twee woorde wat dieselfde klink en dieselfde gespel word, maar heeltemal ʼn ander betekenis en oorsprong het, byvoorbeeld “toetakel” (‘opsmuk’) en “toetakel” (‘te lyf gaan’).
Sien ook die bladsy Homonieme.