'n Sinoniem vir "klerikaal" is "kerklik"; klerikale werk word dus deur 'n geestelike of iemand wat verbonde is aan 'n kerk uitgevoer.
Werk wat deur 'n klerk uitgevoer word, kan beskryf word as "klerklike werk".
Sien ook die bladsy Twyfelwoorde (mits vs tensy).

Die "Tweetalige Voorsetselwoordeboek" dui aan dat dit "kans op reën" moet wees.
'n Mens hoor egter dikwels ook "kans vir" en "kans van", waarskynlik in navolging van die Engelse "chance for/of rain".
Sien ook die bladsy Kollokasies.

Samestellende samestellings word vas geskryf en bestaan tipies uit ʼn woordgroep (byvoeglike naamwoord "plaaslike" + selfstandige naamwoord "owerheid") en ʼn selfstandige naamwoord "verkiesing". Die "-s-" is 'n verbindingsklank.
Sien ook die bladsy Samestellende samestellings.

Om hierdie antwoord uit te pluis, moet jy die woordsoorte in ag neem. "Nuwe" is 'n byvoeglike naamwoord wat die soortnaamwoord "generasie" bepaal - soortgelyk dus aan "nuwe motor". In hierdie geval tree "generasie" as kategorienaamwoord op wat 'n soortnaam bepaal, soortgelyk aan gevalle soos "tipe blom", "kategorie werkwoorde", "soort motor", ensovoorts. Ons het dus 'n "nuwe generasie motor". "Mercedes-Benz" verbind in 'n samestelling met sy subkategorie, naamlik die "C-klas", en ons skryf dus "C-klas-Mercedes-Benz".
Sien ook die bladsy Woordsoorte.