Vreemde woorde wat verafrikaans word, word volgens die gewone Afrikaanse taalreëls gespel. Die woord "ritme" is 'n verafrikaansing van die Griekse woord "rhuthmos".
Sien ook die bladsy Verafrikaanste woorde.

Die meeste woorde in Afrikaans neem "-er" in die vergrotende trap en word nooit saam met "meer" gebruik nie.
(Bron: HAT6)
Sien ook die bladsy Trappe van vergelyking.

Sommige buitelandse plekname word verafrikaans. So word "British Columbia" in Afrikaans "Brits-Columbië". Die gebruik van die koppelteken by sodanige benamings kan in die AWS (reël 12.31) nageslaan word. Die naam van die Suid-Amerikaanse staat "Colombië" word in beide Afrikaans en Engels met 'n "o" i.p.v. 'n "u" gespel.

Sien ook die bladsy Plekname.

'n Werkwoord benoem die aksie of proses in 'n sin. Een manier om vas te stel of 'n woord 'n werkwoord is, is om te kyk of daar 'n verledetydsvorm van die woord bestaan, wat gewoonlik met "ge-" aangedui word, byvoorbeeld "krepeer - gekrepeer". Let daarop dat vir woorde wat uit twee lettergrepe bestaan en op "-eer" eindig, soos "krepeer", die "ge-" in die verlede tyd opsioneel is.
Sien ook die bladsy Woordsoorte.