Die trappe van vergelyking van lang byvoeglike naamwoorde word dikwels deur die toevoeging van "meer" en "mees" gevorm. In sulke gevalle kry die byvoeglike naamwoord slegs 'n "-e" as uitgang en nooit 'n verdere "-er" of "-ste" nie.
Kyk in die AWS (www.woordelys.co.za) of 'n spesifieke woord "meer/meeste" neem om trappe van vergelyking te vorm.
Sien ook die bladsy Trappe van vergelyking.

Hoewel vokaalverswakking plaasvind, word die "uh"-klank soms nog as "o" gespel ter wille van die Afrikaanse speltradisie.
Sien ook die bladsy Lang/kort vokale.

In 'n eienaamverbinding as soortnaam wat bestaan uit 'n nie-eienaamgedeelte ("vierdeur") gevolg deur 'n eienaamgedeelte ("Ford"), word die nie-eienaamgedeelte met 'n koppelteken vas aan die eienaamgedeelte geskryf.
Sien ook die bladsy Eienaamsamestellings.

Aangesien Russiese woorde en name in die Cyrilliese alfabet geskryf word, moet dit eers getranslitereer word voordat dit opgeneem kan word in tekste van tale wat van die Latynse alfabet gebruik maak, soos Afrikaans, Engels, Duits of Frans. Elkeen van hierdie tale het hul eie transliterasiereëls om sulke woorde so leesbaar en "volkseie" as moontlik aan te bied. Die Russiese skryfwyse van die naam "Wladimir Poetin" is "Владимир Путин". Die ekwivalente Engelse en Duitse transliterasies daarvan is onderskeidelik "Vladimir Putin" en "Wladimir Putin".
(Bron: http://af.wikipedia.org/wiki/Wladimir_Poetin)

Sien ook die bladsy Verafrikaanste woorde.