Gravis-/akuutteken

Die akuutteken word gebruik om betekenis en woordsoorte te onderskei. Byvoorbeeld:

• Wat doen jy ná skool? teenoor Hy reis môre na Amerika.
• Sy soek die sleutel. (bepaalde lidwoord) teenoor Dié sleutel lyk anders as die res. (aanwysende voornaamwoord)

Dit word ook gebruik om woorde te beklemtoon. Byvoorbeeld:

• Die goed is darem dúúr!
• Jy moet óf die blou rok óf die groene dra.
• Hy is nóg vis nóg vlees.

Sommige woorde van vreemde herkoms word ook met 'n akuutteken gespel en behou die spelling soos in die oorspronklike taal. Byvoorbeeld:

• attaché
• cliché
• négligé
• séance

Sommige mense beweer dat Franse leenwoorde wat op 'n "é" uitgespreek moet word as [ee], soos attaché as a-ta-sjee. Dit is egter nader aan die oorspronklike Frans om dit as 'n [əi] uit te spreek as a-ta-sjy.

Lees meer In hoofstuk 4 van die Afrikaanse Woordelys en Spelreëls kan jy meer lees oor die gebruik van die akuutteken in Afrikaans.

 

 

---

Die gravisteken

 

In teenstelling met die akuutteken word die gravisteken hoofsaaklik gebruik om by sommige woorde die [ε]-klank aan te dui. Byvoorbeeld:

• appèl
• dè
• hè
• nè

Dit word ook by woorde van vreemde herkoms gebruik soos wat dit in die oorspronklike taal gebruik word. Byvoorbeeld:

• crèche
• pietà
• première

Lees meer In hoofstuk 8 van die Afrikaanse Woordelys en Spelreëls kan jy meer lees oor die gebruik van die gravisteken in Afrikaans.