Byvoeglike naamwoorde (soos "wit" of "groot") word gewoonlik los van selfstandige naamwoorde (soos "huis" of "kantoor") geskryf. Wanneer betekenisverdigting egter plaasgevind het, vorm die twee begrippe 'n eenheid en word hulle dan vas as een woord geskryf. So byvoorbeeld sou die los geskrewe begrip "wit huis" na enige huis wat wit geverf is, kon verwys. Die "Withuis" verwys egter baie spesifiek slegs na die bekende Amerikaanse woning.
Sien ook die bladsy Betekenisverdigting.

Ons gebruik dubbelaanhalingstekens om 'n aanhaling aan te dui. Dit kan 'n woord, frase, sin of 'n langer stuk teks wees.
(AWS13.4)
Sien ook die bladsy Aanhalingstekens.

'n "Tweegatjakkals" is 'n onbetroubare persoon wat net so geslepe soos'n jakkals is. Die uitdrukking verwys na 'n regte jakkals wat sy jagter ontglip deur in enige gat, soos 'n erdvarkgat, te verdwyn en nie noodwendig in sy eie gat nie.
Sien ook die bladsy Idiome, spreuke en spreekwoorde.

Dié harige spinnekop het 'n klomp name in Afrikaans: rooiroman, roman, romanspinnekop, spekvreter, vetvreter, jagspinnekop, jaagspinnekop, haarskeerder, haarskeerderspinnekop of haarsnyer.
Algemene name van insekte begin met kleinletters.
Sien ook die bladsy Dier- en plantname.