Die Engelse "anxious" kan in Afrikaans in verskillende kontekste vertaal word met óf "gretig" (wat 'vol begeerte' of 'hartstogtelik' beteken), óf "angstig" (wat 'met vrees/angs gevul' beteken). Adelé was in hierdie konteks hopelik nie met angs gevul om poskantoor toe te gaan nie!
Let op dat "angstiglik" en "gretiglik" nie as erkende woorde in formele Standaardafrikaans beskou word nie, net soos "huidiglik" en "wettiglik".
Sien ook die bladsy Twyfelwoorde (mits vs tensy).

"Sigself" is 'n wederkerende voornaamwoord, soos "homself" of "myself". Dit is egter geslagsneutraal en sou in kontekste soos die volgende gebruik kon word: "'n Gebruiker moet sigself vergewis van die bepalings en voorwaardes." Dit is egter meer gebruiklik in Afrikaans om te skryf: "'n Gebruiker moet homself...", aangesien die verstekgeslag in die Afrikaanse grammatika manlik is.
Sien ook die bladsy Kollokasies.

'n Telwoord (soos "ses") + "honderd", "duisend", "miljoen", "miljard" kan los of vas geskryf word, maar nie met 'n koppelteken nie.
Sien ook die bladsy Samestellings.

Woorde word normaalweg afgebreek volgens betekenisvolle dele en lettergrepe, maar wanneer 'n "n" en 'n "g" langs mekaar voorkom, word daar altyd tussen hulle afgebreek, al is daar verskillende uitspraakmoontlikhede van hierdie letterkombinasie.
Sien ook die bladsy Woordafbreking.