Die woord "privaat" of "private" is 'n adjektief of byvoeglike naamwoord. Adjektiewe beskryf die eienskap van die naamwoord. ’n Adjektief moet voor ’n selfstandige naamwoord kan staan, byvoorbeeld: Dit is ’n “privaat” skool. Adjektiewe het ook trappe van vergelyking, byvoorbeeld: “privaat”, “meer privaat”, “die privaatste”.
Sien ook die bladsy Woordsoorte.

Die meervoud van "kras" is "krasse". Ons skryf die konsonant dubbeld om seker te maak dat die vokaal kort bly.
"Krasse" in hierdie sin beteken 'krapmerke'.
Sien ook die bladsy Meervoudsvorme.

Aan sommige name word 'n bepaling toegevoeg wat deel van die naam van die betrokke persoon word; dit word 'n toenaam genoem. In so 'n geval begin die hoofdele van die toenaam (byvoorbeeld telwoorde of byvoeglike naamwoorde, maar nie lidwoorde nie) met 'n hoofletter.
Sien ook die bladsy Slegs hoofletter.

Neweskikkende voegwoorde behou hul woordvolgorde asof die sinsnede onafhanklik is, byvoorbeeld "en", "maar", "want," "of", "asmede", en "dog". By onderskikkende voegwoorde (alle ander voegwoorde) verander die woordorde.
Sien ook die bladsy Woordsoorte.