Volgens die AWS is die woorde "lank laas" en "lanklaas" albei korrek en word as wisselvorme beskou. ʼn Wisselvorm is ʼn alternatiewe spelling van ʼn woord wat steeds korrek is, byvoorbeeld, “terugvoer – terugvoering”; “Mexiko – Meksiko”; “restaurant – restourant”; “teweegbring – teweeg bring”.
Sien ook die bladsy Wisselvorme.

Sommige woorde wat op "f" eindig kry "w" in die meervoud. Die woord "kalwers" is ’n uitsondering aangesien dit "wers" in die meervoudsvorm kry.
Sien ook die bladsy Meervoudsvorme.

Indien soortname in 'n literêre konteks (byvoorbeeld in romans, gedigte, dramas, sprokies, kortverhale, fantasieverhale, folklore, bygeloof en dergelike) as eiename gebruik word, begin hulle met 'n hoofletter (AWS 9.3).
Sien ook die bladsy Slegs hoofletter.

'n Bywoord beskryf die werkwoord of 'n byvoeglike naamwoord. 'n Mens kan bepaal of 'n woord 'n bywoord is deur te kyk of die woord die vraag "Hoe?" van die werkwoord of adjektief beantwoord, byvoorbeeld: Hoe warm was dit gister? Die antwoord: erg.
Sien ook die bladsy Woordsoorte.