Oorronding kan dikwels lei tot verkeerde spelling, aangesien ons in Afrikaans meestal woorde spel soos ons dit uitspreek. Oorronding is 'n verskynsel wanneer mense woorde uitspreek met geronde lippe, waar dit nie nodig is nie.
"kleurtjies" is kleure -'wit', 'rooi', ensovoorts.
"kleertjies" is drag vir kinders.
Sien ook die bladsy Ont-/oorronding.

Wanneer 'n woord reeds op 'n "e" eindig (soos "utopie") en sy meervoud deur die toevoeging van 'n "-e" gevorm word, kry daardie "-e" 'n deelteken.
Sien ook die bladsy Meervoudsvorme.

Wanneer byvoeglike naamwoorde wat afgelei is van woorde wat normaalweg met 'n hoofletter gespel word, deur die voorvoegsel "on-" voorafgegaan word, kan die woord sonder 'n koppelteken met 'n kleinletter vas aan die voorvoegsel geskryf word, byvoorbeeld "onafrikaans", "onboeddhisties", "onbybels". Hierdie woorde mag egter ook met 'n koppelteken gespel word, byvoorbeeld "on-Afrikaans".
Sien ook die bladsy Hoof- of kleinletter.

Die Afrikaanse spelling vir die Franse "gazette" is "gaset".
Sien ook die bladsy Verafrikaanste woorde.