Woorde wat met "her-" begin neem nie gewoonlik 'n "ge-" in die verlede tyd nie. Daar is egter 'n paar uitsonderings wat naas die basisvorm ook "ge-" in die verlede tyd kan neem, soos "herwaardeer" of "geherwaardeer", "hereksamineer" of "gehereksamineer", en "herdefinieer" of "geherdefinieer".
Sien ook die bladsy Verlede tyd.

’n Opeenhoping van vokale tussen dele van ’n samestelling bring nie noodwendig leesbaarheidsprobleme mee nie en ’n koppelteken is dus onnodig, byvoorbeeld “dataontginning”, “naoorlogs”, “pouoogmot”. Indien die leser dit egter vind dat 'n koppelteken leesbaarheid sal verbeter, kan dit wel ingevoeg word (AWS 12.1a).
Sien ook die bladsy Vokaalopeenhoping.

Samestellende samestellings kom voor waar 'n woordgroep ("vars produkte") en 'n ander woord ("mark") verbind. Die woordgroep kan, soos in hierdie geval, bestaan uit 'n adjektief en 'n selfstandige naamwoord. Juis omdat die woordgroep optree as die bepaler in die samestelling, word dit vas aan die kern geskryf.
Sien ook die bladsy Samestellende samestellings.

Aangesien Russiese woorde en name in die Cyrilliese alfabet geskryf word, moet dit eers getranslitereer word voordat dit opgeneem kan word in tekste van tale wat van die Latynse alfabet gebruik maak, soos Afrikaans, Engels, Duits of Frans. Elkeen van hierdie tale het hul eie transliterasiereëls om sulke woorde so leesbaar en "volkseie" as moontlik aan te bied. Die Russiese skryfwyse van die naam "Wladimir Poetin" is "Владимир Путин". Die ekwivalente Engelse en Duitse transliterasies daarvan is onderskeidelik "Vladimir Putin" en "Wladimir Putin".
(Bron: http://af.wikipedia.org/wiki/Wladimir_Poetin)

Sien ook die bladsy Verafrikaanste woorde.